ఆస్పత్రికి వెళ్తే దంపతులపై పడిన వృక్షం – భర్త మృతి, భార్యకు తీవ్రగాయాలు

మృత్యువు ఏ క్షణాన ఏ వైపు నుంచి వస్తుందో ఎవరూ ఊహించలేం. తాజాగా, అలాంటి విషాద ఘటన హైదరాబాద్ లో మంగళవారం చోటు చేసుకుంది. చికిత్స కోసం ఆస్పత్రికి వచ్చిన దంపతులపై అకస్మాత్తుగా ఓ చెట్టు విరిగిపడగా.. భర్త స్పాట్ లోనే ప్రాణాలు కోల్పోయాడు. భార్యకు తీవ్ర గాయాలయ్యాయి. ఈ ఘటన హైదరాబాద్ లో జరిగింది. ప్రమాదానికి సంబంధించిన దృశ్యాలు సీసీ టీవీలో రికార్డవ్వగా వైరల్ గా మారాయి. స్థానికులు, పోలీసులు తెలిపిన వివరాల ప్రకారం.. సికింద్రాబాద్ బొల్లారం కంటోన్మెంట్ ఆస్పత్రికి చికిత్స నిమిత్తం రవీందర్, సరళాదేవి దంపతులు మంగళవారం వచ్చారు. ఈ క్రమంలో ఆస్పత్రి ఆవరణలోని ఓ వృక్షం ఒక్కసారిగా వారిపై కూలింది. ఈ ప్రమాదంలో భర్త రవీందర్ అక్కడికక్కడే ప్రాణాలు కోల్పోగా.. భార్య సరళాదేవికి తీవ్ర గాయాలయ్యాయి. స్థానికులు ఆమెను మెరుగైన వైద్యం కోసం గాంధీ ఆస్పత్రికి తరలించారు. సమాచారం అందుకున్న పోలీసులు ఘటనా స్థలానికి చేరుకుని మృతదేహాన్ని పోస్టుమార్టం నిమిత్తం గాంధీ ఆస్పత్రికి తరలించారు.