సీఎం మమతా బెనర్జీపై అనుచిత పోస్ట్.. విద్యార్ధి అరెస్టు

కోల్‌కతాలో జరిగిన వైద్యురాలిపై హత్యాచార ఘటనపై దేశవ్యాప్తంగా తీవ్ర ఆందోళనలు కొనసాగుతుండగా, ఈ ఘటనకు సంబంధించిన మరొక అసహజ సంఘటన చోటుచేసుకుంది. పశ్చిమ బెంగాల్ ముఖ్యమంత్రి మమతా బెనర్జీపై అనుచిత వ్యాఖ్యలు చేసిన ఓ విద్యార్థిని పోలీసులు అరెస్టు చేశారు.ఆ విద్యార్థి తన ఇన్‌స్టాగ్రామ్‌లో మాజీ ప్రధాని ఇందిరా గాంధీని కాల్చి చంపినట్లే మమతా బెనర్జీపైన కూడా కాల్పులు జరపాలంటూ వ్రాశాడు. ఈ వ్యాఖ్యలు రాజకీయ వర్గాల్లో తీవ్ర ఆగ్రహం రేపాయి. విద్యార్థి బెదిరింపు పోస్టు తృణమూల్ కాంగ్రెస్ పార్టీ కార్యకర్తల దృష్టికి రావడంతో వారు పోలీసులకు ఫిర్యాదు చేశారు. ఫిర్యాదు మేరకు, పోలీసులు కీర్తిశర్మ అనే బీకాం సెకండియర్ విద్యార్థిని అదుపులోకి తీసుకున్నారు.ఈ పోస్టు సోషల్ మీడియాలో వైరల్ కావడంతో పోలీసుల దృష్టి పడింది. విద్యార్థి చేసిన పోస్టు రెచ్చగొట్టేదిగా, వర్గాల మధ్య విద్వేషాన్ని పెంచేదిలా ఉందని పోలీసులు పేర్కొన్నారు. అలాగే, కోల్‌కతా ఘటనలో హత్యాచారానికి గురైన బాధితురాలి పేరు, ఫోటోలు కూడా సోషల్ మీడియాలో పోస్టు చేసినట్లు గుర్తించి, ఈ నేరాల కింద విద్యార్థిపై కేసు నమోదు చేసినట్లు ప్రకటించారు.ఈ సంఘటన మరింత ఉద్రిక్తతను పెంచుతుండగా, కోల్‌కతా పోలీసులు పరిస్థితిని నియంత్రించేందుకు చర్యలు తీసుకుంటున్నారు.